يوميات عميل

مصرف الكريمي داريين اننا احبهم حب ماله حدود، لكن هم دائما يشتوا يطفشونا، وانا احاول افهمهم اننا عميل مهم، صحيح اننا اول مادخل الفرع اعمل حالة طوارئ ، رغم اننا مسكين وامزح مع الموظفين وما عمري صيحت.
طيب ذحين ايش الجديد؟
ولا حاجة . انما امس عملوا لي رسالة اروح استلم بطاقة ماستر كارد ، دخلت اليوم مغرب وانا مروح وقدنا تعبان ومليان نوم عشان مانمت الا 3 ساعات، وقدلي فترة اتشارع انا والزميل جيف بيزوس . جنن بافكاري جيف رغم انه اغنى رجل في العالم حتى بعد ما زوجته شلت عليه نص ثروته ، وشكله يشتي يطلع خسارته من ظهري, وانا اشرحله برواق وبلكنه هندية واقول له راعي لمن توصل بطاقة بلوتوا باحاسبك ، مله شاشقي وشاندي مو شاهرب وهو ولا رضي يفهم، يوميا رسائل عبى لي الانبوكس .
المهم نرجع لدخلتي للكريمي ورغم اننا مليان نوم، الا اننا حبيت اكون عميل مخلص وانشر السعادة فانطلقت بصوتي الشجي وانا اغني اغنية :
باباي رجل البحار .. عااااد بعد طول انتظار .. عاااااد ومعه زيتونه .. وبلوتوا الغدار .
وبعد تصفيق حار من الجمهور انخرطت بالطابور كعميل محترم .
وبعد ان وصل دوري طلبت من الموظف بطاقتي والابتسامة على محياي من الطرف للطرف حتى يكاد وجهي ان يتحول الى اسنان باكمله، طلب مني. رفم تلفوني وبكل سرعة ورشاقة اعطيته رقم الجوال ، دور مالقاش ثم اعاد الكرة مرة اخرى برضه ملقاش البطاقة ثم اعادها كرة اخرى وبرصه مافيش .
بعدها احالنا للمدير والمدير دور وبرضه مافيش وبالاخير طلع الكشف دور واخيرا اسمي موجود لكن البطاقة مش موجود على فكرة المدير اسمه (موجود )😅 ومش مزاح اقسم ان اسمه كذا (موجود) . بس انا كنت متفائل بالاسم فبعد تحري وفحص لقينا البطاقة والخلل انه عليها مسجل رقمي القديم اللي قد غيرته في 2018 عندهم واقسم، اننا جلست اعامل عشان اغيره لاكثر من ستة اشهر، وبعد ما اتغير اعتبرته انجاز تاريخي، وقد كنت كتبت عنه مقال طويل وعن رحلتي الشاقة عشان اغيره، انما وقفت انشر المقال عشان كان في حملة ضد الكريمي وانا مشاكلي معظمها مشاكل حظ لا اكثر ولا أقل.
رغم هذا كله سلام الله على تعاملهم مقارنة بالبنوك الاخرى لدرجة ان واحد من البنوك الكبيرة والمشهور خلانا اكتب بالكريمي قصائد غزل من سوء وطريقة تعاملهم معي وانا فقط كنت رايح أورد اخذت العملية يومان كاملان.